Preparación A receita da pepitoria pode parecer algo complicada pola cantidade de preparacións previas que hai que engadir ao guiso. A boa noticia é que se mantés a orde que che vou ir dando nestas elaboracións, case podes empregar exclusivamente unha cazola e evitar lavar moitos cacharros. A orde de preparación é o segredo para que a pepitoria deixe de ser complicada e quede simplemente no que é: deliciosa! Aínda que o normal é guisar en pepitoria o polo de curral en anacos, desta vez, imos preparar peituga de polo de curral guisada en pepitoria. Como esta peituga vén coa pel, é ideal para que esta preparación guisada quede moito máis tenra, zumarenta e, tamén, saborosa. Proceder apróximado: Coce nun caciño dous ovos en auga durante 12 minutos. Pela e reserva. Nun chisquiño de aceite e na tarteira que vaias empregar para guisar o polo, frite dúas rebandas pequenas de pan. Reservamos. Tosta a seguir unha manchea de améndoas e resérvaas. Engade un chisco máis de aceite e doura por todas as beiras posibles as peitugas con sal e pementa. Un xeito diferente de comer peituga de polo de Curral que conquistará os cativos e os maiores. Retira as peitugas e nese mesmo aceite sobrante rustre a cebola e o allo picados moi miúdos. Mentres rustren as verduras, nun batedor, tritura as améndoas fritidas xunto co pan, as dúas xemas e unhas febras de azafrán. Engadimos un chorriño de auga quente ata obter unha pasta espesa. Unha vez rustrida a cebola e o allo, devolve o polo á cazola e engade un vaso de viño branco. Deixa que se evapore o alcohol uns minutiños e engade a pasta triturada máis 200 ml de caldo de polo ou auga. Deixa cocer durante uns 15 minutos ben tapado e remexendo a salsa de cando en vez e chegarás á fin desta deliciosa receita coa loxística de preparación adaptada o máis posible á máxima de “mínimo esforzo, máximo resultado”. Acompañamento: patacas esmagadas Coce en auga unhas patacas pequenas lavadas e con pel ata que estean ben brandas. Nunha tixola, pon un chisco de aceite e uns dentes de allo esmagados. Cando se empecen a dourar os allos, engade as patacas e esmágaas cun vaso groso ou cun mazo. Deixa que se douren por ambos os dous lados, bota sal e pementa e acompaña o polo con elas. Presentación Pódese decorar coas claras cocidas sobrantes moi picadiñas, cun pouco máis de xema relada e, por suposto, pódese, e débese, acompañar esta peituga de polo cunhas ricas patacas.
