O Grupo Coren reforza o seu compromiso co campo galego coa compra de 4.250.000 quilos de castaña para alimentar os porcos Selecta en 2023, o que supón unha achega de 6.600.000 euros

O convenio de compra foi ratificado por Manuel Gómez-Franqueira, presidente da cooperativa, con Jesús Quintá, xerente de Alibós, a maior empresa colleitadora do sector en Galicia

Coren cumpre unha década consolidado como un dos principais dinamizadores do sector ao adquirir a castaña en tempada para logo a pelar, cocer e conxelar como alimento dos porcos durante todo o ano

Ademais de achegar riqueza ao rural, esta iniciativa ten unha importante repercusión ambiental: equivale a 137.000 castiñeiros nunha superficie de 1.800 hectáreas, que absorben a emisión de 10.700 toneladas de CO2

Desde hai unha década, o Grupo Coren desenvolve un papel dinamizador no sector da castaña en Galicia grazas ao seu importante volume de compra, que destina á alimentación da súa gama de porcos Selecta. Xa que logo, a cooperativa galega vén de renovar o convenio anual de adquisición de castaña para o ano 2023, un acordo que foi ratificado esta semana por Manuel Gómez-Franqueira Álvarez, presidente do Grupo Coren, e Jesús Quintá, xerente de Alibós, a principal empresa recolledora e transformadora de castaña de Galicia. No encontro estiveron tamén presentes Manuel Gómez-Franqueira Otero, conselleiro de Coren; Natalio Rodríguez, director de Frigolouro; e José Luis Rey, responsable de compras do Grupo.

O convenio para 2023 ascende a 4.250.000 quilos de castaña, o que representa unha achega económica de 6.600.000 euros. A cooperativa adquire a castaña cada ano en tempada para logo pasar por un proceso de pelado, cocción e posterior conxelado, o que permite a súa conservación coa finalidade de a destinar á alimentación dos porcos durante todo o ano.

Na última campaña de recollida da castaña, a colleita minguou por mor da climatoloxía marcada pola forte seca do ano pasado, o que non favoreceu este cultivo. Sexa como for, o importante volume de demanda de Coren supón un papel estabilizador no sector, contribuíndo á xeración de riqueza e á dinamización económica do rural, ao complementar os ingresos das familias do campo, ademais de preservar os soutos fronte ao risco de desaparición que sofren polo abandono. Unha acción que se enmarca dentro da Política de Responsabilidade Social de Coren de impulsar iniciativas dirixidas a fomentar o progreso do entorno rural no que desenvolve a súa actividade. 

Coren cumpre xa unha década como un dos principais demandantes de castaña para a alimentación do seu porco Selecta, proxecto lanzado ao mercado en 2012 como froito dunha iniciativa de I+D da cooperativa, para recuperar a alimentación dos porcos con castaña, como sempre se fixera en Galicia, o que lle dá un sabor especial á carne. De feito, a gama está consolidada como unha das máis exitosas da cooperativa, tanto na súa liña de frescos coma na de curados, co seu Xamón Selecta “O de Castañas” como referente.

Para o impulso da súa Gama Selecta, o Grupo vén demandando desde hai anos a adopción de medidas para promover a plantación de castiñeiros como un cultivo rendible (de feito, os estudos do sector indican que a rendibilidade dunha plantación coidada e con variedades de valor engadido é similar á dunha hectárea de viñedo).

COMPROMISO AMBIENTAL

A compra de castaña por parte de Coren implica tamén unha destacada repercusión medioambiental, xa que o volume adquirido representa a produción duns 142.000 castiñeiros en 1.865 hectáreas de terreo, que absorben ao ano case 11.100 toneladas de CO2. Deste xeito, a cooperativa contribúe á protección do medio ambiente en consonancia cos principios fundamentais da súa Política de Responsabilidade Social.

COMPARTIR: