ABANCA e Coren activan opcións de crédito para facilitar o financiamento aos cooperativistas

Os socios da cooperativa optarán a produtos específicos lanzados polo banco con sede en Galicia para o sector agroalimentario

O traballo conxunto das dúas entidades permite ofrecer alternativas de crédito para realizar investimentos ou facer fronte aos gastos correntes.

ABANCA e Coren veñen de asinar un novo convenio que reforza a súa colaboración e permite facilitar o acceso ao crédito aos preto de 3.200 socios desta cooperativa.

O director xeral de Coren, Emilio Rial País, e o director territorial de ABANCA en Ourense, Rubén Saavedra Pedreira, rubricaron hoxe un acordo que renova a aposta que mantén a entidade financeira co sector primario galego. No acto tamén participou o director de ABANCA Agro, Jesús Combarro Pereira.

O convenio permite aos cooperativistas acceder a condicións melloradas na contratación de produtos como pólizas de crédito, préstamos, anticipos, subvencións e impostos, leasing mobiliario, liñas de comercio exterior, confirming, avais ou liñas de desconto. Unha oferta que inclúese na unidade ABANCA Agro, que agrupa un catálogo específico, xestores especializados e respostas adaptadas ás necesidades do sector.

Precisamente o acento deste texto asinado hoxe recae no financiamento para a posta en marcha de novos proxectos e a mellora competitiva dos actuais. Ofrécense produtos propios e convenios oficiais con organismos autonómicos e estatais. Outro punto relevante do convenio dá resposta ás necesidades de circulante das explotacións, grazas a unha póliza de crédito especialmente deseñada para atender tensións de tesourería.

Grazas a este texto, os socios de Coren optarán ás vantaxes que ofrece o Programa Cero Comisións, que permite deixar de pagar polo mantemento das contas e tarxetas, pero tamén polas transferencias, ingresos de cheques ou outros servizos habituais. A entidade tamén porá a disposición de todos os cooperativistas xestores especializados en financiación ao sector agro-gandeiro e tamén en materia de seguros.

O Grupo Coren constitúe a maior cooperativa agroalimentaria de España, con máis de 3.200 socios e 3.000 traballadores. ABANCA conta coa rede máis extensa de oficinas en Galicia e cunha oferta axeitada para pemes e autónomos.

COMPARTIR: